Extre enn Pyes - Dernye Akt

Enn gramaten, fam-la pe makiye devan laglas ek kan li fini, li
azenu devan so mari ki pe dormi, fer enn lizye du kuma enn mama pe get
so piti dormi ek anbras li lor so lazu. So mari leve, ek pus li...

Jistans twa depi mwa !

Monn mari plen avek to fason koze ek to latet jir pu konpran.

To agresivite ensit mwa pu vinn pli agresif ki twa.

Depi nu pe viv ansam tusel, mo ena lenpresyon ki to pe transform mwa an zanimo.

Seki explik de lane san okenn kreasyon artistik.

Mo pa sir si mo pu kapav viv avek to bann manyer pu lontan...

Sitan mo pe bwar bann konprime pu dormi, mo pe santi mwa deplizanpli
depresif ek lur, kumajir enn jimunn kinn perji jireksyon, ki nepli kone
kifer li vivan.

To pe detrir mo gu pu viv avek to bann ekzizans moral kan to mem to konport twa kuma enn fam ki ranpli ar imoralite.

Seki sorti depi to labus ek to fason viv, demanti seki to apel tomem.

To kone kifer maryaz aranze mars pli bien ki bann self-servis? Dan
premye-la ena respe. Enn relasyon ant enn mari ek fam, mem si laz inn
detrir romans, zot kapav viv ansam bien dan lamitye si ena respe.
Parkont, si ena lamur ek pena respe, li vinn enn lanfer ziska to kumans
ayir tomem pu amure avek seki fer twa sufer.

Monn abes mwa ziska pli pir pu fer sa relasyon marse ek zorji kan li
enn fyasko ek mo get mwa dan laglas, mo truv enn san lamurprop.

Si mo kontinye viv avek twa dan fason ki to ete, mo pu nepli kapav get momem.

To prezans pu fer mwa kontinye ena santima pu twa. Sekivejir, viv avek degu.

Mo pli gran fristrasyon, li pa kuma to jir, mo lanfans malere ek mo fami so inyorans.

Mo pli gran fristrasyon :

tonn fer mwa realize ki desizyon pli enportan ki monn pran dan mo lavi, li mo pli gran erer.

rido

© Tahir Pirbhay

Mekredi Nwar - La-ont Morisyen !

Enn zour finn pase
lepep pe kalme
ankor enn semenn zot gete
merkredi nwar
pou rant dan bliye

Lepep divize
sakenn dan so kominote
kan zot pu konpran
ki Laura pa ti zis enn zanfan
kreol
li ti enn zanfan tou
kominote

Demin kan zot zanfan
ki pou enn zelev
parmi trwasan sinkant mil
kinn trouv lamor
akoz enn minis inkonpetan,

ki refiz
so responsabilite
ki res an liberte
ek kontinye azir
touzour kouma minis,

parey kouma moi
zot pou vomi ek ser
zot koudpoin, lizye ranpli
ek kriye ki zot onte
zot Morisyen

- Gokool touzour Minis Ledikasyon ek zis kominote kreol ki pe manifeste pou so demisyon.

http://pirbhaytahir.hi5.com

MERKREDI NWAR – GOKOOL INSILTE LAURA !

Lamour prop demann Minis Gokool kit so post trankil ek vit. Li pena okenn rezon valab pou zistifye so inkonpetans, alor li pa donn nou okenn lezot sans me kroir ki li enn san lamour prop.

Me sa minis PTR la, pa zis li pena konsyans me li mari grosye parski linn azout insilt dan domaz ki so inkonpetans inn fer.
Gokool dir ki lor 350,000 dimounn, enn sel etidian kinn trouv lamor. Eski pou Minis Ledikasyon, sa etidian la so lavi pena valer ? Kitfoi si sa tifi la ti parante ar Gokool, ousoi li ti enn zanfan enn lot minis, so reaksyon ti pou diferan. Eski Navin Ramgoolam so silans lor sa deklarasyon Gokool la vedir ki li dakor ?

Gokool ena pouvoir pou fer ferm tou lekol dan bann ka spesyal kouma merkredi dernye me li pann fer li. Linn fer prev ki li pa konn pran desizyon kan ena bann problem. Alor kouma lepep kapav kontinye donn li responsabilite zot zanfan ? Eski li ti al demann Navin Ramgoolam konsey si li ti ena dout ousoi pa kone ki pou fer ?

Mo konpran ek salye bann abitan St Croix pou zot manifestasyon pou demann demisyon Gokool.

Navin personalite de lane dan enn "ZOUE" TOPFM

Dan enn so bann "zoue", bann oditer TOPFM ti soizir Navin Ramgoola kouma personalite de lane 2007.

Kouma dan sak "zoue" ena enn gagnan. Preske tou oditer panse ki bann lezot oditer pou miz plis lor personalite ki okip pli gran plas dan pei. Dan sa lozik-la, dapre zot, Premye Minis so lakot pli bon parski zot panse ki pli boukou dimounn pou soizir li. Samem ki nou apel konportman lafoul.

Parmi bann oditer kinn partisip dan sa "zoue"-la eski TOPFM kapav rasir nou ki pa ti ena bann adolesan ek bann zanfan?

Si premyerman TOPFM pa ti soizir okenn oditer kouma gagnan, sekivedir li pa ti pou enn "zoue" ek dezyem-man si TOPFM donn enn garanti ki zot pa pran an konsiderasyon bann sms depi bann moin de 18 an, lerla li ti pou ena kredibilite.

Sinon nou apel sa enn zoue, enn badinaz... ek enn zoue ki ouver pou bann zanfan pena valer dan lemond politik.

Tahir Hussen Pirbhay
http://pirbhaytahir.hi5.com

IMOUR NWAR

Morisyen sant lindepandans dan langaz kolonyal

Le 12 mars bann Morisyen pou kas zot poz lor zot sofa ek zot lizye pou brake lor tele pou get bann parad ek seremoni lev pavyon.

Zot tou pou resanti zot fyerte nasyonal ek kan lim nasyonal pou zwe ek pavyon kat kouler pou mont dan ler, zot pwal osi pou lev dan ler - frisone !

Parey kouma toulelane, mwa ek bann lezot patriyot langaz Morisyen, pou gagn enn melanz riye ek degou kan nou get lepep Morisyen pe sant lindepandans dan langaz kolonyal.

Toulezour Morisyen koz kreol ant Morisyen, me zour lindepandans, zot sant dan langaz zot bann "Sir".

Ki fyerte nasyonal zot pe zaze kan zot pa fyer zot prop langaz ek sant liberte dan langaz kolonyal ?

Ti pou mari serye ki lane prosenn, parey kouma Minister Lar ek Kiltir inn organiz enn konkour bann sante patriotik sa-lane-la, zot organiz enn konkour lim nasyonal !

Pa fasil pou gard bann lespwar koumsa…

Mo prefer met mo lespwar lor lezot zafer ki ena plis sans pou arive.

pibliye lor lemauricien le 14 Mars 2008