Nou konsider nou-mem kouma enn-de-bann pei pli sivilize ek edike dan kontinan Lafrik.
Si sa bann kalifikatif-la li depann lor progre ekonomik ek sosyal konpare avek bann lezot pei afriken, li vre.
Me si nou get sa lor enn pwindevi politik, pa finn ena bel evolisyon dan sistem elektoral ek dan fason ki dimounn vote. Li vinn enn zistwar kominalis ek koumadir bann fanatik lekip foutborl : " Mwa mo Liverpool, mwa mo Manchester, mwa mo MMM, mwa mo Ptr eksetera " ; pir ankor : " Mo pa vot soz mwa, mo pa vann mo kominote… mo pa vann mo relizyon… "
Ena bann parti politik dan Moris ki ankor nom zot parti dapre zot kominote, pourtan finn abolir sa pratik kominalis-la dan foutborl lokal. Esperon ki zot pa pou atann beze leve pou met enn term lor sa bann move pratik-la.
Lot zafer. Seki kapav rasanble plis kas ena plis sans pou fer pli "zoli" eleksyon. Par milyon zot gaspiye pou lwe bis, pou transport dimounn dan bann miting, lor bandrol, poster ek, san-oubliye, donn portab, dvd, tempo ek lezot zafer kado pou kouyonn bann swadizan "intelizan". Sirtou akonpanye avek enn nouvo lide pou drog lepep, kouma dernyeman, "bis-gratis" - enn gaspiyaz initil ki lepep pe regrete.
Bann Morisyen koumadir zot konn zis trwa mouvman politik. Bann lezot parti, seki fer alyans avek sa trwa gran parti-la pa inportan pou zot. Seki inportan, li sa trwa gran parti-la. Gran, pa par zot intelizans, me par zot non. Enn grander ki avegle bann Morisyen pou pa trouv lezot parti politik mem si plizyer sa bann parti-la ena bann dimounn byen kale. Personn pa interese pou al get miting parti X, Y, Z - parski zot pa pou gagn transpor gratis pou pran zot divan zot laport ek retourn zot, ek sirtou, laba pena briyani gratis ! Ala Morisyen so lintelizans !
Mo terminn sa ti mesaz-la par rapel zot ki dan nou pei swadizan intelizan, bann politisyen finn laplipar-ditan fornike ant zot. Enn kout ou trouv MMM avek MSM, lot kout li avek Ptr, ek bann lezot parti-osi rantre-sorti avek sakenn. Ek sa eksit lepep ! Dan zot miting zot bann lider ek kandida kriye koumadir bann soular lor koltar san dir nanye intelizan, zis pran nisa avek bann lezot adverser, ek kan zot gagn eleksyon, zot defile koumadir bann barbar dan pei…
Mo admir Pravind pou so desizyon ki li pou al tousel dan eleksyon, mem si nou kone, ek nou kone ki li byen kone, ki sa pou mari difisil. Omwin li enn dimounn ki ena bann prinsip ek vre lide dan so mouvman. Me lavenir pou dir si li pou gard so parol ek li pa pou re-al fornike ankor. Esperon ki sa nouvo politisyen-la pou kre enn revolisyon dan lespri bann Morisyen. Esperon ki li pou montre sa bolom ki finn fek koumans fer politik, ki li ti an-tor pou tret li "tro zenn".
Me kitfwa boug-la tro vye pou konpran.
Eski 2010 pou ankor enn viktwar bann fornikater ?
Enn partouz politik ?
Jean Pirbar
0 comments:
Post a Comment